Psa 60 | NdeIBE | STEP | Kumqondisi wokuhlabelela. Kulandelwa itshuni ethi, “Iluba lesiVumelwano.” Imikithami kaDavida. Elokufundisa. Lapho alwa lo-Aramu Naharayimi lo-Aramu Zobha, njalo lapho uJowabi athi ekubuyeni kwakhe walahla phansi ama-Edomi azinkulungwane ezilitshumi lambili eSigodini seTshwayi. Ususilahlile, O Nkulunkulu, wabhidliza izinqaba zethu; ubukade uthukuthele

Psalms 60

1 Ususilahlile, O Nkulunkulu, wabhidliza izinqaba zethu; ubukade uthukuthele – manje ake usivuselele!

2 Usulizamazamisile ilizwe waliqhekeza; namathisela imikenke yalo ngoba selivevezela.

3 Ubabonisile abantu bakho izikhathi ezilukhuni; usiphe iwayini elisenza sidiyazele.

4 Kodwa kulabo abakwesabayo usuphakamise uphawu lokubahlanganisa ndawonye

5 Sisindise, usisize ngesandla sakho sokunene, ukuze bonke labo obathandayo bakhululwe.

6 UNkulunkulu usekhulumile esendlini yakhe engcwele: “Njengomnqobi ngizayaba iShekemu, ngisicande iSigodi saseSukothi.

7 Ngeyami iGileyadi, loManase ngowami; u-Efrayimi uyisidlodlo sami, uJuda uyintonga yami yobukhosi.

8 IMowabi ingumganu wami wokugezela, phezu kuka-Edomi ngiphosela amanyathelo ami; phezu kweFilistiya ngihalalisa ukunqoba.”

9 Ngubani ozangiletha edolobheni lemithangala na? Ngubani ozangiholela e-Edomi na?

10 Kakusuwe na, O Nkulunkulu, wena osusilahlile, ongasaphumi lathi ezimpini zethu?

11 Siphe usizo sehlule isitha, ngokuba usizo lomuntu kalusilutho.

12 Nxa siloNkulunkulu sizanqoba, njalo uzazinyathelela phansi izitha zethu.